Mythology ki mithya, hum insaano ki kritya!!

MUSIC & DANCE HEALS US

& 

I DANCE FOR MOTHER EARTH

Mithya aur Kritya: Ek Andekha Safar

Kya aapne kabhi socha hai ki sach aur jhoot, mithya aur kritya ke beech ka farq sirf hamare perception ka hai? Shayad dono ek hi stambh ke do chhor hain—jaise us aadi aur ant ki kahani, jahan swayam Brahma aur Vishnu apni mahanta ka gyaan paane nikle the, lekin ek dusre ke samarthan mein ulajh gaye. Tab Sadashiva ko unke beech is dwand ko samapt karne aana pada, aur isi leela ki yaad mein hum Shivratri ka tyohaar manate hain.

Ab sawal yeh hai ki jab swayam bhagwaan bhi iss dharti par ek samanya jeevan jeete hue apne kritya ko samajhne aur poora karne aaye, toh hum jo unhi ka ansh hain, kya bina kisi uddeshya ke yahan bheje gaye hain? Sach yeh hai ki hum abhi bhi ek chhal mein jee rahe hain—apni ‘azaadi’ ko fake freedom samajh kar maze le rahe hain, lekin apne asli swarup ko pehchaan nahi rahe.

Mythology as a Myth?

Aapne kabhi socha hai mythology ko myth kyun kaha jata hai? Us samay na pen tha, na paper, na koi storage ya Google. Kahaniyan keval drishya, kala, aur symbols ke roop mein safar karti thi—pathar ki chattanon, kapde k uper ki gyi kala, aur alag-alag bhashayon ke mix ke madhyam se. Jo kuch bacha, vo adhura tha. Aur wahi adhuraai, mithya ka roop le chuki hai.

Zara sochiye, kya ek Ramayan ya Mahabharat apne purane swarup mein saari chhoti-chhoti baatein samet paayi hongi? Ramji ke vyaktitva ke un 5113 din, jab unhone vanvaas mein apni maryada aur shakti ka bodh kiya, kya kisi granth ke panne un chhoti-chhoti baaton ko poori tarah samjha paye honge? Yeh wahi chhoti-chhoti baatein hain jo kisi bhi vyakti ko vishesh banati hain, lekin wahi kahaniyon ka adhura roop ban gaya hai.

Aatmaroopi Anubhav: Sach ka Safar

Sach kya hai? Sach woh hai jo andar chhupa hai—apne aap ko samajhne ka ek safar. Ashtavakra Geeta kehti hai, "Aatmagyaan hi sabse mahan gyaan hai." Par is safar mein asaan kuch nahi hai. Aapko apne hi prakash mein jeena padega, apne andar ke sach ko samajhna hoga.

Insaan ek paradox ban chuka hai—kabhi gender ki galat pehchaan, kabhi emotions ki uljhan. Hum masculine aur feminine feelings ke asantulan mein ulajh jaate hain, jabki asli shanti toh ida aur pingala ke balance mein hai. Aur yeh balance hume apne soul ke painful, lekin sunder safar mein aage le jaata hai.

Mera Anubhav: Ek Lekhak ki Kahani

Yeh mera 12th blog hai—aap sabse ek baat share karte hue btana chahti hoon ki main ek aise safar par hoon jo mujhe khud ke andar ki aawaaz sunna sikhata hai. Har pal, har anubhav mujhe yeh samjhata hai ki sach aur jhoot ka matlab bahar nahi, andar hai.

Main galtiyan karti hoon, unse seekhti hoon. Kabhi khud ko guilt, ahankaar ya irshya ke tarazu mein nahi tolti, kyunki sab ek unique journey par hain. Aur yeh safar mujhe har din yeh yaad dilata hai ki asli jeevan ka mahatva "insaan bankar jeene" mein hai—puri tarah, bina kisi dar ke, bina kisi filter ke.

Zindagi ek opportunity hai khud ko samajhne ki, apne andar ke saagar ko chaanhne ki. Toh chhoti-chhoti baaton ko ignore mat kijiye, kyunki wahi aapka sach banati hain, aur wahi sach aapka kritya, aapki niyati tay karta hai.

Apne andar ki shanti ko samajhiye, us prakash ko paayiye jo aapko apni asli aatmaroopi journey mein aage le jaaye. Balance karna seekhiye, aur yeh samajhiye ki success in life sirf materialistic nahi, balki ek spiritual awakening hai.

Aakhir, aapka asli safar toh aapki aatma ke roop mein jeene se shuru hota hai. Kya aap tayar hain us safar ke liye? 🌟

Jald hi milte hai "HAR HAR MAHADEV"